يالا نبني مصر بجد...واحنا في سنة تالته!!!

يالا نبني مصر بجد...واحنا في سنة تالته!!!

الحمد لله رب العالمين ... حققت ثورتنا جزء كبير من النجاح باسقاط رؤوس الفساد في مصر
وكل واحد فيكم كان ليه دور وفضل في هذا النجاح
كل واحد
اللي رابط واعتصم في الميدان
واللي نزل وشارك في مظاهرات في كل شوارع مصر
واللي ساهم بصورة ... بفيديو ...بكلمة نشرها علي الانترنت
واللي وقف يقنع أهله وناسه بجدوي ماكنا نسعي اليه
واللي صلي ودعا لنصرة الشباب وحرية مصر
واللي حتي سكت ومكانش عارف يتصرف ازاي او يعمل ايه
برده ساهم انه ماوقفش امام حركة شباب زي الورد
حتي اللي عارض ... برده ساهم
ساهم بفكرة ساهم بكلمة ثبتت زمايله ...اكدت ليهم انه كان لازم نغير
واسقطنا رؤوس النظام
لكن ...حد فاكر فيكم حديث الرسول صلي الله عليه وسلم اللي ذكر فيه
عدنا من الجهاد الأصغر للجهاد الأكبر؟؟
هوا ده وضعنا الحالي
ولازم كل واحد فينا يبقي مدرك تماما الحقيقة دي
احنا لسه ماغيرناش مصر
احنا بس فتحنا باب التغيير
اداناها فرصه تستعيد شبابها
تتبني من أول وجديد
انما لسه كتيييييير
طيب وبعدين... نعمل ايه يعني؟
مبادرات كتير علي الانترنت وكلام كتير عن الدستور والوزارة الجديدة والرئيس القادم والنتخابات بالرقم القومي والغاء الحرس الجامعي .....و...و....و....
وحملات نظافة شوارع ....وحملات يالا نبني مصر ويالا نحب مصر ويالا ...ويالا ...ويالا
المشكلة الكبيرة اللي انا متخوف منها تكون مجرد بواقي روح ثورة  يناير وبمجرد ان نصتدم بالامتحانات والمذاكرة من جديد
تتغير الاولويات وتتبدل المواقف او تتنسي
المشكلة الأكبر ... ان كل الحملات والمواقف والمشاركات مابتزيدش عن كونها كلااام أو مناقشات او حتي افعال قصيرة الأجل
أكيد مطلوبة...بس مش هيا الاساس
مطلوب تغيير حقيقي
عايزين روح يناير وثورتنا تنعكس علي كل حياتنا
تصرفتناومواقفنا واحلاقيتنا.......ومذاكرتنا 
جينا للكلام اللي يعكنن
محنا في ثورة يا دكتور والدنيا "بيييس" وكله تمام
ده اللي بيجي في بالنا
بس لازم نفتكر
مافيش امه بتنهض من غير تعليم بجد
مافيش بلد بتتغير من غير شباب متعلم وواعي ومثقف
والتعليم عايز مذاكرة....والمذاكرة في الكتاب...والكتاب تحت المكتب...والمكتب مليان تراب
أصله مهجور من زمان....!
والحمد لله ...الاجازة اتمدت...وعندنا وقت نراجع كل اللي اخدناه في النصف الاول
لازم نستغل اللي باقي من الاجازة
كفاية اللي ضاع
مش حابب أطول عليكم
بس حابب أذكر
ان كنتم بتحبو مصر بجد ...حابين تشوفوها غير
لازم تغيروها بجد
لازم تشتغلوا ...مش بس أعمالى تطوعيه لأ...نعمل شغلنا الأول
كل واحد في مكانه
أنا طالب...يبقي اذاكر واجتهد وانجح باعلي الدرجات

يا سنة تالته...مصر محتاجه مذاكرة

سنة تالته ... عدوي القلق الوراثي

بسم الله الرحمن الرحيم

ازيكم يا شباب

كل عام وانتم بخير

يارب يجعلها سنة سعيدة عليكم جميعا

وكل واحد يحقق فيها كل اللي بتمناه باذن الله

طبعا ناس كتير مشدودة بسبب بداية سنة تالته

وناس مرعوبة

وناس محتاسه

وناس ... مكبرة ولسه مش واخدة بالها أصلا ان تالته جت

طبعا كل واحد عنده اسبابه ومبرراته

اللي عايز يعلي ترتيبه في الدفعه

واللي محتاج يعلي تقديره

واللي عايز يثبت نفسه السنه دي بعد ماخلص من الهستولوجي والبايو

واللي مش عارف هوا عايز ايه اصلا...!

اما الأغلبية الغالبة

قلقانة بسبب العدوي ...!

ايوه...عدوي القلق...!

ده مش مرض هانخده في الامراض المعدية "البكتريا أو البارا"

انما هوا فعلا موجود

قلق سنة تالته قلق وراثي

بتنقله دفعه ورا دفعه

وبيسلموه لبعض جيل ورا جيل

يمكن تكون السنة فعلا من اصعب سنين الكلية

بس صدقا ... هيا من أمتع سنين الكلية علي الاطلاق

لعدة أسباب:

1. سنة تالته ... هي أول سنة تشعر فيها وكأنك طبيب حيث تبدأ في التعمق في المواد الطبية المرتبطه بالمريض و ما يصيبه

علي عكس اولي وتانية ... مواد أساسية ... يجد العديد منا الصعوبة "في بداية الأمر" في تحديد أهميتها في الحياة العملية.

2. سنة تالته... مش هاتقدر تغمض عينيك...خالص... بمعني أنها سنة غير ممله علي الاطلاق... كل موادها جديدة جدا بالنسبه للطلبة

شاقه الي حد ما .. طويلة الي حد كبيييير.

3. سنة تالته ... من السنين اللي بترفع التقدير العام لكتير من الناس ... اه والله بجد "وقد يحدث العكس" لكنها عادلة شئ ما مقارنة بما سبقها بمعني ... علي اد ما هاتديها ...ان شاء الله تكون النتيجة.

4. سنة تالته ... سنة فيها دروس كتيره "وده لا فرض ...ولا سنة...!" لكن هاتتعرف فيها علي ناس كتير... دكاترة مميزين...مواقف مالهاش حل "اغلبها الطريف ... ومنها الطريف  برده...حيث ان شر البلية ما يضحك"

يعني من الاخر كده

سنة تالته ... سنة من السنين اللي مابتتنسيش من العمر في الكلية تمام زيها زي سنة خامسه بالظبط

وأسالوا زمايلكم الأكبر "بس حذار...حذار من المرض المعدي ...عدوي القلق"

السنة فيها مميزات كتيرة

لكن برده فيها عيوب كتيرة كمان ... زي:

1. كم المواد: هي من أكبر السنين كما في موادها وكبر حجم مناهجها.

2. أهمية المواد: حيث ان مواد السنة تعتبر الاساس الحقيقي للعلوم الطبية التطبيقية

3. كثرة الامتحانات: معدل امتحانات عالي جدا في السكاشن واعمال السنة ونصف العام و ... و... .

4. الاجهاد: فعلا هي من أكتر السنين المجهدة جسمانيا "خاصة للي بياخدو دروس كتير" لكثرة التردد علي مراكز الدروس والسكاشن و المراجعات.

5. سوء ترتيب الاولويات: ودي اهم مشكلة بيقع فيها الشباب في سنة تالته... بمعني الاتي:

* سوء ترتيب الاولويات في المذاكرة... يعني مثلا الشباب تذاكر الفارما والباثولوجي ... وتهمل البارا والمايكرو طوال العام لتصطدم بالواقع العنيف قبل الامتحانات مباشرة فيكون الاضطرار للتأجيل

* سوء ترتيب الاولويات في مذاكرة المادة الواحدة... بمعني ان في بعض الناس بتهتم باجزاء معينه قبل الامتحان وتهمل الاجزاء الاخري.

او تركن المادة علي ماتخلص من امتحان السكشن وده برده غلط.

*  سوء ترتيب الاولويات في الدروس... بمعني انك تاخد درس ممكن تكون مش محتاجها علشان الناس كلها بتاخد المادة دي... وتيجي علي حساب ماده انت شخصيا عندك فيها مشكلة.

لكل ما سبق ...خلينا نرتب اولوياتنا كويس ونشوف ايه اللي المفروض نعمله علشان باذن الله نطلع باعلي النتائج:

1. الهدوء العصبي...... بلاش نصاب بعدوي القلق لأن ده بيقلل قدرتنا علي اصدار احكام صائبة او اتخاذ قرارات مناسبة.

2. عدم الاندفاع وراء القطيع... ودي مشكلة خطيرة عندنا في مجتمعنا وفي طب بالذات... فما يناسبك قد لا يناسب غيرك والعكس صحيح ايضا .... بمعني لا تأخذ أحكام او قرارات من سبقوق وكانها مسلم بها "وهذا لا يتناقض مع الاستفادة من خبرات الاكبر"

3. الدروس: لا تتسرع في أخذ الدروس.... فهي ليست بالفرض ولا بالسنة ... انظر الي ما تحتاجه انت

هل تفهم من المحاضرات؟

هل تستطيع تجميع "لم " المادة بسهولة ويسر؟

هل بدون الدروس لن تستطيع التواصل او فهم المادة؟

جاوب علي كل هذه الاسئلة قبل اتخاذ قرار أخذ درس ...وامامك الاسبوع الحالي ..احضر المحاضرات وابدأ في القراءة أولا بأول لتتخذ القرار الصائب .

ان كان قرارك انك مش هاتاخد دروس... اهنئك بشدة لديك المحاضرات ...وتسجيلات الدروس علي النت... ومساعدات الدكاترة

توكل علي الله ولا تتردد.

طيب وان كان قرارك انك هاتخد درس.... ؟

اولا: حدد المواد التي تحتاجها فعليا ...دون الاندفاع خلف زملائك فقط.

ثانيا: احضر في اقرب مكان ليك "للسكن او الكلية" توفيرا للوقت ...فلن تشعر بقيمة هذه النقطة الا مع تقدم الدراسة.

ثالثا: فيما يخص الدكاترة واختيار الي من ستنضم....اعلم ان الكمال لله وحده

وان لكل انسان فينا مميزات وعيوب ولولا اختلاف الاذواق لبارت السلع

بمعني

كل دكاترتنا كويسين جدا

ومتمكنين من موادهم العلمية

ولكن للعشاق فيما يعشقون مذاهب

يعني انا ممكن استريح مع دكتور حسن ....وانت مع دكتور حسين وهكذا ولا تتأثر بحمي الاعلانات العنيفه الخاصة بكل مركز

طب اعرف ازاي ايه المناسب ليا؟

ببساطة شديدة ...جرب

احضر حصة لكل دكتور في المادة اللي انت محتاج تاخد فيها وقارن بشكل سريع بين ورق كل واحد فيهم في نفس الجزئية

وشوف ايه اللي مناسب ليك ومستريح عليه

لأن ببساطة شديدة ...كل الدكاترة مركزين كويس اوي

بمعني محدش بيعمل ورق ناقص

او مابيشرحش اجزاء من المنهج

او كما يقال كثيرا ويتداول بين الطلاب كوجهات نظر

قد يكون بعضها وجه في بعض الاحيان

توكل علي الله

ماتضيعش وقت في التردد

أهم نقطة في سنة تالته

هي الاوقات البينية.....!

يعني ايه دي كمان؟

يعني الوقت اللي فاضي عندك بين درسين أو سكشنين او سكشن ومحاضرة

استغلال هذه الاوقات البينية مهم جدا جدا جدا

وهو ما يصنع الفروق في التقديرات بين الناس

بمعني ابسط.... حاول قدر الامكان ان تقلل من الوقت المهدر بين المواعيد المختلفه للمحاضرات والسكاشن والدروس

وان كان لابد يبقي نستغل الوقت ده في قراءة محاضرة او درس

او مراجعة حصة او فصل من النهج

وهكذا

في نهاية الكلام خليني ألخص ليكم الموضوع ببساطة:

1. توكل علي الله ولا تقلق فتالته سنة ممتعه ومجهده ايضا.

2. المحاضرات قوية جدا في كثير من المواد وقد تكون كافية تماما.

3. الدروس ليست بالفرض في سنة تالته وان كان لابد فاختر ما تحتاجه فقط.

4. رتب اولوياتك صح في المذاكرة والوقت ولا تذاكر مادة علي حساب الاخري.

5. ذاكر أولا باول ولا تراكم المواد عليك.

6. تكرار مرات المذاكرة للموضوع الواحد افضل بكثييير من مذاكرته في وقت طوييل.

7. واخيرا..... ربنا بيقول في سورة البقرة...."واتقوا الله ... ويعلمكم الله... والله بكل شئ عليم" "سورة البقرة الايه 282"

يعني ببساطة.... ومن يتقي الله ...يجعل له مخرجا ... ويرزقه من حيث لا يحتسب

بالتوفيق ان شاء الله

ولنا غدا لقاء اخر مع .... المايكروبيولوجي

د.أحمد رمزي

Back to school

Wait For Bacteriology Stories in the new year

To feel the other worlds

worlds of Micro- organisms

ما تريد أن تعرف عن امتحان المايكرو القادم

"الموضوع خاص بطلبة طب عين شمس"
بسم الله الرحمن الرحيم
ازيكم يا شباب
يارب تكون ماساة الباثولوجي عدت علي خير
او علي الأقل من غير عاهات مستديمة
معلش
احنا ولاد النهاردة
خلينا في المايكرو
واضح ان في اسئلة كتيره الناس محتاجه تعرف اجاباتها وهيا بتذاكر للامتحان
1. توزيع الدرجات:

• أعمال السنة العملي:     20 درجة
• أعمال السنة النظري:   40 درجة
• العملي :                   40 درجة

وكل ماسبق تم امتحانه

• المجموع =              100 درجة
• الباقي    =              100 درجة

مقسمين كالاتي:

• 80 درجة نظري
• 20 درجة شفوي

"يعني ببساطة لازال امامكم 50 % من درجات المادة....يعني اللي كانت درجاته مش كويسه اوي في اعمال السنة ...لسه أمامه فرصة كويسة اوي ان شاء الله"

2 . نسب الدرجات وفقا لكل فرع "branch":
تقريبا..."ولا يستطيع أحد ان يجزم بغير ذلك الا رئيس القسم" توزع الدرجات كالاتي:
Systemic 40%
Immunity 20%
Virology 20%
General 15%
5% Mycology

والنسب السابقة نسب تقريبية غير ثابته علي الاطلاق

وقد تزيد "في الغالب" نسبة ال systemic علي حساب الاخرين.
"معني الكلام ده ايه....؟ انه لازم الاس تكون مركزة كويس أوي علي ال systemic اكثر من اي فرع اخر

3. نظام الامتحان:
بالنسبة لنظام الامتحان كالاتي:
40 درجة MCQs وبرده خليني اتفق معاكم علي الاتي... قد تزيد أو تنقص درجات الwritten علي حساب ال MCQs

40 درجة Written

4. وقت الامتحان:
مدة الامتحان ساعتين مقسمة كالاتي:
40 دقيقة لل MCQs
80 دقيقة لل written

وطبعا الامتحان الساعة 10 "وياريت دايما ياجماعة نحاول نكون في الكلية من بدري لأن الطريق غير مضمون علي الاطلاق... في سنة من السنين كان الريس .... حفظه الله واطال عمره كمان وكمان وكمان كان معدي ورايح الكلية الفنية العسكرية ... وطبعا كل الدنيا اتقفلت وطبعا اغلب الدفعه لم يصل في وقت الامتحان ... يومها ربنا ستر والعميد أجل الامتحان ساعة كاملة ... علشان كده ياريت نخرج بدري ونقعد بكرامتنا من بدري نراجع في الكلية ... ماحدش عارف الريس ممكن يحب يروح فين يوم الامتحان".

5. نظام الاسئلة:
أولا: ال MCQs

كالعادة ... كما تعودنا سؤال وعدة اجابات نختار الادق فيها
بس من فضلكم .... رجاء حار الالتزام بالاتي:

• احضار قلم رصاص معاكم للاجابة في الورقة الخاصة بذلك وياريت استيكة كمان.
• الاجابة مباشرة في ورقة الاجابة "يعني من الاخر ماحدش يجاوب في ورقة الاسئلة ويرجع ينقل في ورقة الاجابة تاني... مافيش وقت للكلام ده خالص وهاتتسحب منك الورقة قبل ماتخلص... جاوب وممكن ترجع تمسح -ماحنا قلنا رصاص- وتصلح اجابتك لو ربنا فتح عليك باجابة جديدة!!!"
• من فضلك وانت تقرأ السؤال علم او حط خط علي الكلمات المهمة التي تعتبر مفتاح الاجابة في السؤال.
• لا تنسي التأكد من وجود كلمة except أو عدم وجودها في السؤال.
• السؤال اللي ياخد معاك وقت طويل في التفكير حط جنبه علامة وانتقل للي بعده "علشان ماتضيعش وقت" خلص اللي تعرفه الأول ثم ارجع مرة اخري لما تركته.
• ماتفكرش تغش من الاول ... استعن بالله كده وحاول وربنا هايفتح عليك ... اما لو كنت سايب ضميرك في التلاجه في بيتكم ... فلا تنسي التأكد من نموذج الامتحان!!!

"من غشنا فليس منا"

• 
  
  لو مافهمتش سؤال او حسيت انه محطوط غلط "كما يظن الكثيرين احيانا" ماتضيعش وقت في السؤال عن معناه لأن غابلا ماحدش هايفيدك وهاتعطل نفسك وزمايلك ...ركز وجاوب اللي بعده وفي الاخر ابقي اتخانق واعمل اللي انت عايزه بس لما تخلص باقي الاسئلة.
• 
  
  هدوء الاعصاب .... هدوء الاعصاب... هدوء الاعصاب.

انا عارف ان كلكم عارفين الكلام ده كويس بس مافيش ما يمنع ان احنا نفكر بيه بعض تاني وتالت

ثانيا ال Written :

احنا عرفنا عدد الاسئلة ووقت الامتحان

يتبقي أن نعرف ان الامتحان عبارة عن أسئلة قصيرة "Short essay"

يعني اسئلة في أجزاء صغيرة في المنهج لا تحتاج الي رغي كتير في الاجابة

وكل سؤال تتراوح درجاته من درجتين الي اربع درجات واحيانا 5 درجات

لكن رجاءا الالتزام بالاتي:

• 
  
  عند استلام الورقه... برجاء القاء نظرة سريعة علي توزيعة الدرجات المكتوبة أمام كل سؤال و ذلك لتلافي حدوث المشكلة التي حدثت مع زمالائكم العام قبل الماضي

"الامتحان كانت الدرجات علي كل الاسئلة تتراوح ما بين 3 و 4 درجات ولكن السؤال الأخير في الامتحان .... ايوه الأخير كان عليه 8 درجات...!!! وطبعا الناس اللي نسيت نفسها في الوقت وقعدت تكتب كتير في كل سؤال بعضهم ساب السؤال الاخير صاحب اعلي الدرجات ...!!!"

• 
  
  برجاء كتابة المطلوب منك فقط وعدم تضييع الوقت في معلومات اضافية لن تزيد او تنقص "ممكن تزود لما تكون خلصت الامتحان كله وعندك وقت مش عارف توديه فين".
• 
  
  من فضلك حاول تراعي الترتيب في الاجابات للتسهيل علي المصحح وان لم يحدث وبدأت بسؤال قبل الاخر من فضلك وضح رقم السؤال جدا جدا.
• 
  
  اذا احسست أو اكتشفت انك جاوبت سؤال غلط لا تقم بالشطب عليه بعنف فقط اكتفي بخط بسيط علي السؤال واعد الاجابة مرة أخري ... حتي تعطي للمصحح فرصة ايجاد ما يمكن وضع درجات عليه.
• 
  
  عدد الاسئلة في الامتحان غير ثابت ... يتغير من عام لاخر ومن درو لاخر فلا تشغل نفسك بالعدد ... حل اللي يتحط ادامك.
• 
  
  المقارنات تكون افضل اذا تم وضعها في جداول.

حاول الاجابة بقدر الامكان علي هيئة نقاط محددة واضحة وليست برجرافات طويلة غير محددة.

6 . نظام المذاكرة وتوزيع الأيام:

دي بتفرق من واحد للتاني ... وصعب نقترح نظام لاختلاف كمية ماتم استذكاره من شخص لاخر وكذلك اختلاف نقاط الضعف والقوة من جزء لاخر بالمنهج

كل ما أطلبه هو الاتي:

• لا تبدأ من الأول .... بمعني لا تبدأ با لجنرال للأنه قتل من كتر المذاكرة في النصف الاول من العام وكذلك لسهولته.
• اذا فضلت تبدأ بالجنرال فمن فضلك برده لا تبدأ من الأول ... ابدأ من الاخر ... يعني ذاكر الفصل السابع الأول "Infection control " وهو فصل هام جدا جدا جدا بارغم من احساسكم انه كلام جرايد بس لازم تفهموا الاتي: ان دكتور اسامه رسلان من أوائل الاساتذه اللي أدخلوا العلم ده وارسوا قواعده في مصر و هوا ايضا اللي واضع هذا الجزء في الكتاب وهو أيضا مدير وحدة مكافحة العدوي بالكلية .... لكل ما سبق وغيره .... فهذا الجزء بالغ الأهمية.
• بالنسبة للمناعة ... ايضا نبدأ من أول ال Hypersensitivity وللاخر ... يعني نبدأ من النصف التاني وليس من الأول أيضا لأن ده أكتر جزء فيه اسئله في الامتحان واكتر جزء محتاج تركيز وماتذاكرش كويس.
• بالنسبة لل سيستيمك والفيرولوجي .... رجاءا مذاكرة كافة التفاصيل "هافكركم الامتحان اسئلة قصيرة!" يعني كل المعلومات مهمه في كل درس وان شاء الله هاكتب ليكم بعض التجميعات وطرق التفكير المنظم واستنتاج الاجابة تباعا.
• اعمل جدولك ووزع فيه الماده وفقا لحالة المذاكرة الخاصة بك ... مع مراعاة الالتزام , وترك اليوم الاخير للمراجعة النهائية ان شاء الله علي المنهج كاملا "النقاط المهمة".
• رجاءا عدم تضييع أي وقت فلم يتبقي الا القليل.... جدا ولكنه كافي جدا جدا.

7 . التوقعات والأسئلة المهمة:
ودي النقطة اللي الكل مستنيها
والسؤال المتكرر علي لسان الجميع
بس للأسف هاخيب ظنكم المرة دي
لأن ماينفعش نسيب حاجه من المنهج ونذاكر حاجة بعينها فقط بأي شكل من الأشكال
لأن الامتحان بيجي في كل حته وأي حته
ولا تصدقوا ...أكرر ... ولا تصدقوا أي اشعات أو كلام ينسب لي أو لأحد الاساتذه أو الزملاء عن وجود أشياء هامه وأخري غير هامه في المنهج
لأن من القواعد التي وضعها دكتور أسامة رسلان هو السؤال في كافة أجزاء المنهج كاملا "انا عارف كتير زعلانين من الكلام ده ... بس للامانه يا شباب ده العدل بجد ... ينفع يتساوي اللي ذاكر كل كلمه .. وحضر المحاضرات ... واتمرمط في الدروس... وطلع عينه  باللي ماعملش حاجه خالص وجاي ياخدها علي الجاهز؟؟؟ اكيد ده مش عدل اطلاقا."
لكن ... هذا لايمنع من التركيز علي المواضيع الكبيرة والأساسية في كل جزء
 "the common is common "
وطبعا ده للناس اللي فايتهم اجزاء كبيرة أما اللي ذاكر كل حاجه ... ركز وراجع تاني علي كل حاجه ..بهدوء ... وربنا هايكرمك وهاتفتكر كويس أوي ان شاء الله.


8 . امتحان الشفوي:

لنا معه وقفه أخري قريبا ان شاء الله "نخلص بس من النظري"

ملحوظة:

ان شاء الله هاكون موجود علي النت معاكم علي المنتدي والفيس بوك جروب يوميا من اليوم وحتي ليلة الامتحان من 12 مساءا وحتي صلاة الفجر للاجابة علي اي اسئلة أو استفسارات او مناقشات.

وسأوالي تباعا نشر بعض التجميعات الهامة والملاحظات الخاصة بكل جزء من المنهج "ان شاء الله"

فلا تنسونا من دعائكم

اخر الكلام:

"واتقوا الله ... ويعلمكم الله... والله بكل شئ عليم"

 "سورة البقرة الايه 282"

Final Exams

Good Luck

Many thanks for Jasmin for her effort